Skepping en Evolusie Onversoenbaar

Skepping en Evolusie - Onversoenbaar!

Dr. HD Mouton

Bladsye: 432
Grootte: 1.95 MB

ISBN: 1-91975443-1

Ek het vantevore twee boeke die lig laat sien, naamlik:

‘Evolusie: die onwetenskaplike leuen’; en
‘Evolution: the unscientific lie’.

Die Engelse boek was grotendeels 'n vertaling van die Afrikaanse boek, maar met ’n paar byvoegings en enkele korreksies ten opsigte van die Afrikaanse weergawe.

Hierdie boek bevat feitlik al die inligting van bogenoemde boeke, maar is aansienlik uitgebreid, bevat sketse en foto’s en gee meer spesifieke verwysings ter wille van makliker naslaan vir die lesers.

Die uitgangspunt was om eerder moeilik betwisbare argumente as spekulatiewe, moontlik bevraagtekenbare redenasies te gebruik. In hierdie opsig het ek my grootliks laat lei, soos ook met bogenoemde boeke, deur die internasionale organisasie AiG (‘Answers in Genesis’, nou ‘Creation Ministries International’) se oordeel wat juis hierdie baie meer konserwatiewe en wetenskaplik verantwoordbare beleid ten opsigte van sy publikasies volg, in vergelyking met sommige ander skeppingsleerorganisasies. Hiermee ontken ek nie dat my eie waarnemings en vertolkings ook soms in hierdie boek opgeneem is nie. Dat húlle nie bevraagtekenbaar is nie kan ek ongelukkig nie waarborg nie.

Die redes vir hierdie publikasie spesifiek in Afrikaans, is die volgende:

Heelwat Afrikaanssprekendes het 'n behoefte daarna uitgespreek omdat die eerste boekie ‘Evolusie: die onwetenskaplike leuen’ uit druk was en ek nie 'n herdruk oorweeg het nie. 'n Herdruk is nie oorweeg nie omdat heelwat nuwe bevindings intussen na vore gekom het waarmee die saak vir skepping net soveel sterker gestel kan word. ‘n Aansienlike uitbreiding was vir my eerder die antwoord.
AiG in Suid-Afrika het laat blyk dat daar in Suid-Afrika 'n groter behoefte aan Afrikaanse skeppingsboeke is aangesien goeie oorsese Engelse boeke reeds hier beskikbaar is.
Vanweë die meerderheid Afrikaanse kerke se oppervlakkige hantering van die betekenis en implikasie van Genesis, en die evolusieleer wat die afgelope dekade eers in alle erns in Afrikaanse skole verkondig word, het Afrikaanssprekendes oor die algemeen 'n baie gebrekkige kennis van skeppingsleer en die noodsaaklikheid daarvan.
My moedertaal is Afrikaans en ek ondersteun die instandhouding en uitbreiding daarvan ten volle.
Een van die hoofdoelwitte van hierdie boek is om die Afrikaanse kerke wêreldwyd na die waarheid van die Bybel te laat terugkeer.

Hierdie boek is bedoel vir mense:

wat onder die indruk verkeer dat evolusie wetenskaplik bewys is; of
wat van mening is dat daar 'n redelike kans is dat evolusie waar kan wees; en/of
wat vrae het oor die strydige stellings van die Bybel en die bewerings van sekere velde van die wetenskap; en/of
wat dink dat God deur middel van evolusie geskep het; en/of
wat al soms gewonder het of daar werklik goeie wetenskaplike waarnemings bestaan wat op 'n jong aarde en heelal dui, soos wat 'n direkte lees en verstaan van die Bybel (soos dit geskryf is) verklaar; en/of
wat die sienswyse huldig dat Gen. 1 - 11 slegs simboliese betekenis het en wat onder andere wonder wat die simboliese betekenis van die vroeë mense in die geslagsregister se spesifieke hoë ouderdomme kan wees; en/of
wat as leraars opgelei is en dit moeilik vind om sinvol en toepaslik uit Gen. 1 - 11 te preek; en/of
wat in wetenskaplike en historiese kwessies geïnteresseerd is en dit as 'n groot voorreg beskou om God se hand en genade in sy wonderbaarlike skepping te sien; en/of
wat besef dat skeppings- en oorsprongskwessies 'n natuurlike aanknopingspunt kan vorm om met wetenskaps- en natuuringestelde mense oor God en die Evangelie van Jesus Christus te gesels; en/of
wat die gevaar van die evolusieleer besef en kennis wil bekom om dit te weerlê.

Ek verwys dikwels na die “evolusionistiese model” en “evolusioniste”. Nou is dit so dat alle evolusioniste ook glo aan miljarde jare wat al verloop het sedert wat hulle beskou as die begin. Daar is egter ook mense wat nie evolusie aanvaar nie, maar wel miljarde jare, en daarom nie in dieselfde groepering as evolusioniste geplaas wil word nie. Daarom verwys ek ook soms na die “megajaarmodel” en “megakronofiele”. ’n Megajaarmodel is enige model wat aanvaar dat die oorsprong van alles miljoene of miljarde jare gelede was en megakronofiele kan beskryf word as liefhebbers van miljoene of miljarde jare.

Die moeilikheidsgraad in die boek varieer redelik baie. Vanaf hoërskoolvlak behoort die basiese gegewens egter goed begryp te kan word, alhoewel sommige tegniese detail dalk meer naslaanwerk sal verg. Opsommings is agterin van die hoofstukke gegee sodat lesers wat nie in al die detail belangstel nie, maklik die oorhoofse strekking van die betrokke hoofstukke kan kry.

Hierdie boek bevat elektroniese skakels wat aangedui word met onderstreping sodat lesers maklik na verwysde gedeeltes kan gaan.

Skeppingsleerders wil nie voorgee dat hulle al die antwoorde op alle vrae ten opsigte van oorspronge het nie. Daarom beweer ek ook nie dat alles wat in die boek aangebied word, 100% korrek is nie, alhoewel ek my uiterste bes gedoen het om sover my kennis strek, geen onwaarhede weer te gegee het nie. Ek beweer egter wel dat die groter prent die waarheid is want dis gegrond op wat God in die Bybel geopenbaar het

Hierdie boek kan geensins reg laat geskied aan die omvangryke werk wat skeppingsleerders na my mening op feitlik al die relevante velde betreffende spesiale skepping versus evolusie gedoen het en steeds doen nie. Ek hoop egter dat dit die leser se belangstelling sal prikkel, hom of haar sal sensitiseer en laat waak teen die beginsels van evolusie wat in feitlik alle ensiklopedieë en natuurreekse op televisie per geleentheid as wetenskaplike feite verkondig word (wat dit nie is nie), en bowenal sal lei tot persoonlike groei van die leser se geloof in God, die Alleenskepper van hemel en aarde, en sy onfeilbare Woord.

Hennie Mouton

****

Deur deeglike navorsing en logiese en uitgebreide uiteensetting laat sien dr. Mouton hierdie briljante, tydige boek in Afrikaans die lig. Hiermee bevestig dr. Mouton dat die Woord van God, asook alle Bybelgegewens, in alle opsigte betroubaar en waar is, en ook dat dit ware wetenskaplike navorsing ondersteun en selfs bekragtig. Elke Christen en veral predikant, wat nog onomwonde kan bely dat God die Skepper van hemel en aarde is (soos dit in die Bybel beskryf word) behoort dit te lees. Geloof in die drie-enige God van die Bybel word wreed aangeval deur evolusieleer en dit is vir seker hoog tyd dat mense, en veral kinders, gewaarsku word teen die gevare van ’n geloof in evolusie.

Ds. Emile Rademeyer,
NG Kerk Doornkloof, Centurion

****

Inhoudsopgawe van die boek:

Voorwoord

1. Inleiding en toepaslikheid
1.1 Hoekom is die kwessie van skepping teenoor evolusie belangrik, veral vandag?
1.2 Wat is evolusie, of eintlik, wat behoort dit te wees?
1.3 Is evolusieleerstellinge teenstrydig met die Bybel?
1.4 Het die wetenskap evolusie en miljarde jare bewys?
1.5 Kan die wetenskap eenduidig bepaal hoe die oorsprongsmeganisme was?
1.6 Is die werklikheid van Genesis belangrik vir die Christelike geloof?
1.7 Is die werklikheid van die Bybel belangrik vir die Evangelie?

2. Wetenskap, Natuurlike Seleksie en genetiese inligting
2.1 Operasionele wetenskap en oorsprongswetenskap
2.2 Die genetiese stoor
2.3 Natuurlike en gemanipuleerde seleksie
2.4 Haldane se dilemma
2.5 Nuwe genetiese inligting

3. Bybelse gegewens
3.1 Inleiding
3.2 Die Genesisvloed
3.3 Geslagsregisters en tydsdure
3.4 Die Skeppingsweek
3.5 Dinosourusse
3.6 Geen dood voor die sondeval
3.7 Voortplanting volgens soort
3.8 Die ontstaan van Genesis
3.9 Opsommende gevolgtrekkings

4. Die uniekheid van die aarde
4.1 Die aarde se spesiale eienskappe
4.1.1 Regte afstand van die son
4.1.2 Korrekte rotasiespoed van die aarde
4.1.3 Korrekte jaarperiode
4.1.4 Korrekte inklinasiehoek
4.1.5 Korrekte massa en grootte van die aarde
4.1.6 Unieke samestelling van die atmosfeer
4.1.7 Korrekte digtheid van die atmosfeer
4.1.8 Vereiste hoeveelheid osoon
4.1.9 Regte grootte van die maan
4.1.10 Gelyke oppervlak van die aarde
4.1.11 Magnetiese veld van die aarde
4.1.12 Die aarde – ? waterryke planeet
4.1.13 Wonderlike aanvangstoestande en beheer
4.2 Die aarde se spesiale posisie in die heelal
4.2.1 Ons sonnestelsel se posisie
4.2.2 Die Melkwegstelsel se heeltemal unieke posisie
4.3 Gevolgtrekkings

5. Die wêreldwye vloed
5.1 Sedimentêre gesteentes, fossiele en ravyne
5.2 Vloedverhale
5.3 Kontinentverskuiwings en die Ystydperk
5.4 Bergvorming

6. Ouderdomme
6.1 Die aarde se ouderdom
6.1.1 Inleiding
6.1.2 Atmosfeer van die aarde
6.1.3 Sout in die see
6.1.4 Magnetiese veld van die aarde
6.1.5 Jong dinosourusse en selakante
6.1.6 Steenkool
6.1.7 Grotte, stalagmiete en stalaktiete
6.1.8 Boomringe en yslagies
6.1.9 Koraalriwwe en kalkformasies
6.1.10 Erosie van kontinente
6.1.11 Niagara-valle
6.1.12 Hoeveelheid mense op aarde
6.1.13 Radiometriese datering en die geologiese kolom
6.1.14 Opsommende gevolgtrekkings
6.2 Die heelal se ouderdom
6.2.1 Inleiding
6.2.2 Die oerknalteorie en sy probleme
6.2.3 Grootte en ouderdom
6.2.4 Skeppingsteorieë
6.2.5 Spiraalsterrestelsels
6.2.6 Komete
6.2.7 Oorblyfsels van supernovas
6.2.8 Sonuitstraling té konstant
6.2.9 Die aarde-maan-afstand
6.2.10 Die ontstaan van die maan
6.2.11 Te veel oorblywende hitte in die maan
6.2.12 Opsommende gevolgtrekkings

7. Die wonder van tale en volke
7.1 Noag se kleinseuns
7.2 Oosterse nasies
7.3 Tale
7.4 Oudste beskawings
7.5 Egiptiese en Israelse kronologieë
7.6 Oudste godsdienste
7.7 Hoe verskillende “velkleure” met gemeenskaplike voorouers rym

8. Ikone van biologiese evolusie
8.1 Wat ingeligte bioloë verswyg
8.2 Miller-Urey-eksperiment
8.3 Darwin se boom van die lewe
8.4 Homologie
8.5 Haeckel se embrio’s
8.6 Argeopteriks – die verlore skakel
8.7 Peperkleurmotte
8.8 Darwin se vinke
8.9 Viervlerkvrugtevlieë, antibiotika en insekdoders
8.10 Evolusie van perde
8.11 Van aap tot mens

9. Paleo-antropologiese verwarring
9.1 Inleiding
9.2 Wetenskaplike bedrog
9.3 Taung, Lucy en Laetoli
9.4 “Baie ou” moderne Homo sapiens
9.5 Die “hominiedestamboom” en evolusiemodelle
9.6 Die Neandertallers
9.7 Vroeë Homo sapiens
9.8 Breingrootte, intelligensie en klassifikasie
9.9 Homo erectus
9.10 Die Genesisvloed en die Ystydperk
9.11 Nie-evolusionistiese verklarings vir morfologie
9.12 Homo habilis
9.13 Australopitheci, Paranthropi en museums
9.14 Fossieltabelle
9.15 Opsommende gevolgtrekkings

10. Die doel van die evolusieleer
10.1 Aanhalings
10.1.1 Evolusie en die Christelike geloof
10.1.2 Evolusie het ook ’n geloofsbasis
10.1.3 Evolusie is ook op voorveronderstellings gebaseer
10.1.4 Wetenskaplike waarnemings wat evolusie ondersteun is baie skaars
10.1.5 Evolusie se verlore skakels bly verlore
10.1.6 Evolusie dra nie by tot werklike wetenskap nie
10.2 Doelbewuste onderdrukking

11. Afsluiting

Verwysings
Die skrywer
Naskrif
Persoonlike bedankings